Urdu Academy

اُردُو میں کتنے حروفِ تہجی ہیں ؟اس مسئلے پر ہر دور میں ماہرینِ اُردُو کی مختلف آرا رہی ہیں اور آج بھی کچھ لوگ اس سوال کو اٹھاتے رہتے ہیں ۔ ✩  دراصل حروف تہجی کا مسئلہ لسانیات اور صوتیات سے جڑا ہوا ہے اور اسی کی روشنی میں اس مسئلے کا جائزہ لینا چاہیے۔ ہم اپنے اس مضمون  میں اس موضوع  پر بات کرتے ہیں۔ ہم جانتے ہیں کہ لسانیات اور صوتیات کے ماہرین کے مطابق حروف ِ تہجی دراصل آوازوں کی علامات ہیں اور ان کا مقصد کسی زبان میں موجود آوازوں کو  ظاہر کرنا ہے۔ بیسویں صدی کے ابتدائی بیس پچیس برسوں تک یہی خیال کیا جاتا تھا کہ اُردُو میں پینتیس (35 ) یا چھتیس (36 ) حروف ِتہجی ہیں  اور اس زمانے کے ابتدائی اُردُو قاعدوں اور بچوں کو اُردُو سکھانے والی کتابوں میں یہی تعداد لکھی جاتی تھی ۔ البتہ بعض کتابوں میں پہلے  ’’مفرد‘‘ حروف ِ تہجی لکھ کر بعد میں ’’مرکب ‘‘ حروف ِ تہجی لکھے جاتے تھے اور یہ طریقہ بعض کتابوں میں آج بھی ملتا ہے۔ یہ مرکب حروف ِ  تہجی کیا تھے ؟ یہ دراصل ہائیہ یا ہکاری آوازوں کو ظاہر کرنے والے حروف ِ تہجی (یعنی بھ، پھ، تھ وغیرہ) تھے۔ ان آوازوں کو ان...